បណ្ឌិត ហែម ប្រសើរ : ការផ្ដល់ព័ត៌មានពិតជាថ្នាំពេទ្យដ៏ពិសិដ្ឋបម្រើឲ្យការអភិវឌ្ឍន៍សង្គមឋានៈដែលព័ត៌មានក្លែងក្លាយគឺជាថ្នាំពុលសង្គម

ភ្នំពេញ ៖ បណ្ឌិត ហែម ប្រសើរ ប្រធានសមាគមសម្ព័ន្ធភាពអ្នកសារព័ត៌មានក្នុងសន្តិភាព បានបញ្ជាក់ថា រាជរដ្ឋាភិបាលកម្ពុជា នៅតែចាត់ទុកវិស័យព័ត៌មានជាចំណុចអាទិភាពមួយដ៏សំខាន់មិនអាចខ្វះបាន។ ពីព្រោះសារព័ត៌មានជាអ្នកចូលរួមកែលម្អសង្គមតាមរយៈការផ្ដល់ព័ត៌មានពិតនិងគ្រប់ជ្រុងជ្រោយប្រកបដោយតម្លាភាពនិងជាថ្នាំពេទ្យដ៏ពិសិដ្ឋបម្រើឲ្យការអភិវឌ្ឍន៍សង្គមឋានៈដែលព័ត៌មានក្លែងក្លាយគឺជាថ្នាំពុលសង្គមទៅវិញ។

បណ្ឌិត ហែម ប្រសើរ បានបន្ថែមទៀតថា វិស័យសារព័ត៌មានគឺជាអំណាចទី៤ ដែលបានចូលរួមជាក់ស្ដែងនៅក្នុងការកសាងនិងអភិវឌ្ឍន៍ប្រទេសដោយផ្អែកលើមុខងារសំខាន់ៗរួមមាន ទី១.ការចូលរួមពង្រឹងលទ្ធិប្រជាធិបតេយ្យផ្អែកលើមូលដ្ឋាននីតិរដ្ឋ។ទី២.ជាអ្នកផ្ដល់ព័ត៌មានពិតនិងលឿនរហ័សពីលើទៅក្រោមនិងពីក្រោមទៅលើ។ទី៣. ជាអ្នកផ្ដល់ព័ត៌មានបែបអប់រំនិងចំណេះដឹងសម្រាប់ប្រជាពលរដ្ឋនិងជាធាតុចូលសម្រាប់គោលនយោបាយរបស់រាជរដ្ឋាភិបាល។ទី៤.ជាអ្នកឃ្លាំមើលនិងត្រួតពិនិត្យតុល្យភាពសង្គមដ៏ស្មោះត្រង់។ទី៥. ជាអ្នកចូលរួមកែលម្អសង្គមតាមរយៈការផ្ដល់ព័ត៌មានពិតនិងគ្រប់ជ្រុងជ្រោយប្រកបដោយតម្លាភាពនិងជាថ្នាំពេទ្យដ៏ពិសិដ្ឋបម្រើឲ្យការអភិវឌ្ឍន៍សង្គមឋានៈដែលព័ត៌មានក្លែងក្លាយគឺជាថ្នាំពុលសង្គមទៅវិញ។

បណ្ឌិត ហែម ប្រសើរ បានមានប្រសាសន៍ទៀតថា អ្នកសារព័ត៌មានបានរួមចំណែកយ៉ាងច្រើនក្នុងការផ្សព្វផ្សាយរឿងរ៉ាវល្អៗអំពីសង្គមកម្ពុជាទាំងវិស័យទេសចរណ៍ សេដ្ឋកិច្ច សង្គមកិច្ចនិងទូរគមនាគមន៍ ដូច្នេះត្រូវរួមគ្នាផ្សព្វផ្សាយរឿងរ៉ាវល្អៗអំពីកម្ពុជាអោយបានច្រើននិងកាត់បន្ថយការផ្សព្វផ្សាយភាពអសកម្មមួយចំនួនដែលធ្វើឲ្យកម្ពុជាខូចមុខមាត់លើឆាកអន្តរជាតិ។
បណ្ឌិត ហែម ប្រសើរ បានបញ្ជាក់អំពីសារៈសំខាន់នៃការចងសម្ព័ន្ធភាពរវាងអង្គភាពព័ត៌មានទាំងអស់ជាមួយនឹងសមាគមសម្ព័ន្ធភាពអ្នកសារព័ត៌មានក្នុងសន្តិភាព គឺដោយសារតែប្រទេសជាតិមានសុខសន្តិភាពដូច្នេះសេរីភាពសារព័ត៌មានត្រូវបានផ្ដល់ជូនយ៉ាងពេញលេញ។យើងនឹងរួបរួមគ្នាដើម្បីធ្វើកិច្ចការមនុស្សធម៌រួមគ្នា និងរួមគ្នាផ្សព្វផ្សាយព័ត៌មាន អភិវឌ្ឍន៍និងសមិទ្ធផលថ្មីៗរបស់រាជរដ្ឋាភិបាលដែលជាផ្លែការនៃសុខសន្តិភាព ៕