នាយករដ្ឋមន្ត្រីប្រទេសរ៉ូម៉ានីលោក Marcel Ciolacu បានបង្ហោះវីដេអូនៅលើបណ្តាញសង្គម TikTok ផ្លូវការភ្លាមៗធ្វើអោយអ្នកគាំទ្រខ្លាំង ព្រោះលោកទំនងជាបង្ហាញថាគាត់ជាអ្នកគាំទ្ររបស់កីឡាករ Antony។

Ciolacu ត្រូវបានគេចាត់ទុកថាជានាយករដ្ឋមន្ត្រីដែលមានភាពសកម្មខ្លាំងនៅក្នុងបណ្តាញសង្គម ជាពិសេសបណ្តាញសង្គម TikTok ដែលមានការចូលទស្សនារាប់លានអ្នក ប៉ុន្តែកាលពីពេលថ្មីៗនេះ វីដេអូមួយបានផ្ទុះឡើង បន្ទាប់ពីលោកបានទាយឈ្មោះកីឡាករបាល់ទាត់​ ហើយពេលដល់រូបភាពរបស់ Antony គាត់ក៏បានស្រែកឈ្មោះគេភ្លាម។ បន្ទាប់ពីនោះ គេឃើញមានវីដេអូខ្លីៗអំពីជំនាញដ៏ប្រសប់នៃខ្សែប្រយុទ្ធប្រេស៊ីលដែលកំពុងប្រកបអាជីពនៅ Manchester United។

គួររំលឹកផងដែរថា Man United បាននាំយក Antony ពីក្លឹប Ajax ក្នុងតម្លៃកប់ពពករហូតដល់ទៅ 85 លានផោន ប៉ុន្តែចាប់តាំងពីពេលនោះមក រូបគេហាក់មិនទទួលបានការគាំទ្រពីអ្នកគាំទ្រនោះឡើយ ដោយមានតែការសើចចំអកទៅវិញ ដោយមានប្រភពមួយចំនួនជឿជាក់ថាក្រោមការដឹកនាំរបស់លោក Ruben Amorim កីឡាករស្តេចបង្វិលភពរូបនេះអាចនឹងចាកចេញនៅខែមករាខាងមុខនេះតែម្តង៕