ខ្សែការពារ Gabriel Magalhaes របស់ Arsenal បានចំអកឡកលើយ ដោយប្រើប្រាស់ការអបអរគ្រាប់បាល់ដ៏ល្បីរបស់កីឡាករ Viktor Gyokeres បន្ទាប់ពីស៊ុតបញ្ចូលទីឱ្យក្រុមកាំភ្លើងធំទល់នឹង Sporting CP។

ក្នុងការប្រកួត Champions League ដែលបញ្ចប់ទៅដោយលទ្ធផល 5-1 យ៉ាងដំណំ ក្រុមកាំភ្លើងធំបានបើកការនាំមុខ 3-0 រួចទៅហើយនៅវគ្គទីមួយ។ មុនអាជ្ញាកណ្តាលផ្លុំកញ្ចែ ខ្សែការពារប្រេស៊ីល Gabriel Magalhaes ជាអ្នករកគ្រាប់បាល់ទីបី ហើយភ្លាមៗក៏បាននាំយកការអបអរគ្រាប់បាល់តាម Gyokeres ដោយគ្មានទុកមុខអោយម្ចាស់ផ្ទះសូម្បីតែបន្តិច។

អ្វីដែលកាន់តែកាចសាហាវនោះគឺ Gyokores មិនបានរួមចំណែកសូម្បីតែម្តង ទោះបីធ្លាប់ជួយរក hat-trick ក្នុងការប្រកួតមុនទល់នឹង Man City ក៏ដោយ។ គួររំលឹកផងដែរថា ក្នុងនាមជាខ្សែការពារ Gabriel ពេលនេះរកបានបីគ្រាប់រួចមកហើយ ដោយធ្លាប់ស៊ុតចូលសុទ្ធតែក្រុមធំៗដូចជា Tottenham នឹង Man City ទាំងដែលរដូវកាលមុន រូបគេអាចស៊ុតបញ្ចូលទីបានត្រឹមតែបួនដងក្នុងមួយរដូវកាល៕